سابع قطرة عطر

السعادة

السعادة.... هو ايه معني السعادة..؟.

بحب الأغنيه دي...

كانت غنتها يسرا في فيلم حرب الفرولة

قعدت أسمعها...

و برغم أني مش بحب الأغاني

بس دي تدخل في أطار الأغنيه الملتزمة...

عجبتني و قعدت أفكر

هو أيه معني السعادة؟؟

لاقيت السعادة ضحكة صافية

و رضا عن النفس و الدنيا

انك تعطي كل ذي حق حقه

انك تدي من غير ما تبخل..!

و أكيد حد يقدر تعبك و لو بكلمة حلوة..

أكتشفت أن السعادة حاجة قمة الخرافة..

و أنها خيال مش موجود غير في يوتوبيا

بس منكرش اني سعيدة عشان فيه حد بيضحك فوشي

و اني حاسة بأن الناس بتحبني؟؟

بس ناقصني الرضا ..

و ارجع و اقول السعادة ,,, هو أيه معني السعادة..؟

سادس قطرة عطر

لحظة...

هي فترة زمنية لا تتعدي رمشة عين

لحظة ممكن تخسر

و لحظه ممكن تكسب
لحظة ممكن تموت

لحظة تتولد فيها من جديد

ربنا قال فلحظة ... كُن فكُنا

و فلحظة كنت نطفة فرحم

و فلحظة جينه للدنيا...

مش فاضل غير لحظة الخروج

الفرق بين الشتا و الربيع لحظة

و صفاء السما و تلبد الغيم لحظة

و حبي وكرهي الفرق بينهم لحظة

ايمانى وكفري الفرق بينهم لحظة

مين ضامن شئ في الدنيا غير لحظة واحدة ...

مين ضامن يكسب

أو

يخسر

أو

ينجح

أو

يفشل

أو

يحب

أو

يتحب

فيه حقيقة فحياتك غير لحظة موتك

هي اللحظة الوحيدة اللي بندركها وبنركز فيها

أكيد ممتش قبل كدة

بس شوفت ناس كتير ماتت

عشان كدة بنشوف فالموت الخلاص لأنه أخر لحظة

و بعدة مش حنكون رهن اللحظات الخفيه

حنبقي وصلنا للحقيقة

و انا دلوقتي بحاول بقدر الأمكان أكفر عن أخطائي

أستعداداً لأصدق لحظة فالكون

الموت

أكيد خيفة بس ححاول أكون مستعدة للحظة كتير بتيجي فجأة

خامس قطرة عطر

الوان

مش عارفة ليه انا بحب اليومين دول اللون الأحمر؟؟؟

حاسة برغبه في التمرد.... و دا أكيد ليه علاقة باللون الأحمر؟؟

الدم أحمر وبنعيش بيه ... و الورد أحمر وبنحب ريحته

و قرص الشمس ساعة الغروب أحمر وبنعشقه

و الشفايف لحظة الحب بتحمر من صدق مشاعرنا و الخدود كمان

و ساعات بموت فبرود الأزرق و بحس أني عايمة وسط جبال تلج

و جلدي بنفس البرود و قلبي بنفس البرود ومشاعري بنفس البرود

و ساعتها بيكون وقت ممل قوي لأاني مش بحب البرد لأنه بيفكرني بالوحدة

و كتير بحب الأخضر لأنه لون الأرض والشجر

اللي انا بتمني اكون جزء منهم ... ياه قد أيه لما بنام علي الحشيش في الجناين بكون سعيدة

بحس أني جديدة فكل حاجة

بتحس أنك أتولدت من جديد بقربك من عناصر أنت متكون منها الفرق انك متشكل وهي في صورها الأوليه

الصورة اللي مش ممكن ترجعلها لان صعب علينا نرجع للسجية الاولى

بتمني أتولد من جديد كان فيه حاجات كتير فاتتني كنت عملتها و حاجات تانيه كتير مش ممكن أعملها ولا أكررها

منها أني أحب

رابع قطرة عطر

خطيـــــئة

كلنا بنحب حب عذرى ..... كلمة بنقولها عشان نداري حاجات كتير

الحب العذرى كان فعلا موجود بس مش هنا مش بينا ...كان موجود بين آدم وحواء ...هناك فالجنة

مكان مالخطيئة محظورة

و يوم ما ربنا خيرهم أختاروا الخطيئة مع أول فرصة

و كلوا من الشجرة

مفيش حب عذرى

انا أجذم بده بعد ما كنت فاكرة بوجودوا و أكتشفت ان البشر بيخطى غالبا بأسم الحب

كتبت أنهاردة بعد ما أكتشفت أني لازم أعترف أن مفيش حاجة بالنسبالي أسمها حب عذرى

و أن الحب دا جاي من رغبات كتير زي الأمان الأطمئنان و الجنس والسكون و الرغبه في الثبات

كل دا مبرر لعدم عذرية الحب

و بحاول اعرف انا بحب ولا لأ

و أكيد حوصل

ثالث قطرة عطر....

ملكش رفيق.....

عادي جداً.... كلمة بنقولها لما ميكونش فيه جديد مع أن كون ان مافيش جديد دا فحد ذاته جديد لأنأكيد أمبارح غير أنهاردة بكل القاييس...

أيه اللخبطة دي...

انا صحيت من النوم و الدنيا زي كل يوم مش حقول عادي...

و قعدت أفطر فطاري بتاع كل يوم .....

و جالي تليفونات من صحابي بتوع كل يوم...

و انا قاعدة كدة دخلت جوه نفسي لاقتني وحيدة قوي

قلت أزاي وانا عندي صحاب و بجد بمعني كلمة صحاب

عالم مخلصين بجد...

بس لما كنت قاعدة حسيت أني وحيدة

خفت قوي من الأحساس ده و قلت فسري لنفسي...

العيب منك أنتي الناس دي مش مقصرين اللي بتلجئى ليه بيديكي كل اللي عنده

قاعدت أفكر بكل تركيز العيب ممكن يكون فين أكتشفت ان الانسان بفطرته عارف ان الحقيقة الوحيدة فالدنيا هي الموت و أي شئ تاني هو مجرد مواقف قد تكون زي ما بيفهمها او لأ لان مفيش حاجة أسمها حقيقة ....

فوقت علي تليفون ... لاقيت وحدة بحبها جدا و بتقولي..

أزيك ..

قلت

الحمد لله..

قالت

أيه الأخبار..

قلت

عادى جداً

ثاني قطرة عطر....!

لو مقدرتش تضحك

هذه هي الحياة أنك تتنازل عن متعك
الواحدة بعد الأخرى حتى لا يبقي منها شيء وعندئذ تعلم أنه قد حان وقت الرحيل

مقولة جميلة جدا قالها نجيب محفوظ في ساعة من ساعات التجلى

معناها بالنسبه لىَّ موضحش غير بعد ما تنازلت عن أول متعة فحياتى

المهم..... كتير بنشوف وشوش بتضحك ... و كتير بنشوف وشوش بتضحكنا ووشوش بنضحك عليها

وبسأل كتير أيه اللي ممكن يخلينا نضحك من جوانا قوى؟؟؟

او بمعني أصح بنفس

كتير ببقي عايزة أضحك ... و أضحك فعلا ... وقوى لكن دموعي بتكون أقوي فتبتدي عيوني تدمع و تدمع لحد متخرج من حبستها

و ابكى وأضحك حزن وفرح ...!

كتير بنضحك قوي ونقول احنا ضحكنا من قلبنا و بيكون نفسنا نبكي و نصرخ من ألم متخبي و متضفر جوه القلب

و ساعات تكون حتموت وتبكي ودمعتك يعز عليها تنزل...حتى الدوع عندها كبرياء

يوم ما تتنازل عن أخر متعة فحياتك دا معناه أنك لازم ترحل و الرحيل عندي

ان عنيه و قلبى ميشوفوش ومايحسوش الضحكة بجد

و لو مقدرتش تضحك متدمعش ولا تبكيش

أهم حاجة تعرف تحس ....و تحب الحياة

أول قطرة عطر....!

امرأة بدون رتوش....؟

جربت أكون من غير رتوش

لاقيت الرتوش علية زيها زي الهدوم

بتخبي اللي بخاف عليه من عيون الناس

و كتير بقول علي نفسي منافقة بس أكتشفت

أن الرتوش بتستر العورة

عورة العقل

ايوه فكرت فيوم تمشي بعقلك من غير جمجمة...

معتقدش

لأن دا غريب

متسمحلوش يمشي عريان لأنك بتخاف عليه

الرتوش بتحافظ عليه و يمكن تكون بتحليه

فيه فنان بيرسم لوحة و يخلصها من غير الرتوش الأخرانية

الرتوش دي احنا بيها وهي فينا منقدرش نكون منغيرها
عشان كدة أنا امرأة

و مش قادرة أحدد لأني كتير ببقي نفسي أرسم لوحة لعقلي مليانه رتوش

عشان أغطي عورة.......عقلى